Tryater spilet In moaie jûn yn Ysbrechtum

Snits - Op tongersdei 17 oktober om 20.00 oere spilet Tryater In moaie jûn yn Doarpshûs It Nije Formidden yn Ysbrechtum. Kaarten binne te keap fia www.tryater.nl en 06-50265334 of 06-12626670. Op woansdei 23 oktober om 20.00 oere is In moaie jûn te sjen yn It Heechhûs yn Heech. Kaarten binne te keap fia www.tryater.nl of 0515-442593. Tongersdei 24 oktober om 20.00 oere spilet de foarstelling yn Elim yn Skearnegoutum. Kaarten dêrfoar binne te krijen op www.tryater.nl of 0515-413836. De foarstelling komt ek noch yn ûnder oaren Snits, Boalsert, Makkum en Toppenhúzen.

De foarstelling is skreaun en regisearre troch Ira Judkovsakja, artistyk lieder fan Tryater. Ira beskriuwt sitewaasjes rjocht út it libben en sjocht der mei humor nei. Joop Wittermans, Nynke Heeg, Lysbeth Welling en Wouter van Oord spylje fjouwer personaazjes dy’t elk in stap sette wolle yn harren libben. It ferhaal spilet him ôf op Sinteklaasjûn.

Annelys fiert foar it earst sûnt har skieding Sinteklaas. Yn har âlderlik hûs, mei har heit en har soantsje, dy’t noch yn Sinteklaas leaut. It liket in moaie jûn te wurden: De heit sil foar Sinteklaas spylje en twa stúdzjefreonen fan Annelys komme ek gesellich lâns. Al gau docht bliken dat se alle fjouwer dwaande binne harren libben in nije rjochting te jaan. Allegear wolle se fierder of tinke se fierder te moatten. Allinne, hoe witte je dat je fierder geane en net achterút?

De personaazjes binne hiel werkenbere minsken. Ien ding ha se gelyk: se binne op ‘e syk nei gelok en wurdearring en ha dêrom de wil om te feroarjen. Dizze syktocht, mei alle hobbels dy’t der by nommen wurde moatte, foarmet de basis foar sawol pynlik werkenbere, as hilaryske tafrelen.

De foarmjouwing is fan Maria Dourron, de kostúms fan Linda Eijssen. Henk van der Kooi die it ljochtûntwerp, de muzyk is fan Laurens van der Meulen. De gedichten binne fan Peter Sijbenga en de oersetting fan Bouke Oldenhof. De rol fan soantsje Pelle wurdt ôfwikseljend spile troch Hidde Haantjes út Aldemarrum, Mart Hylkema út Aldemarrum, Jitze Pieter Schievink út Sumar, Jorrit van der Velde út Itens en Feike de Vries út Idaerd.

Tryater spilet it In moaie jûn oant en mei 16 desimber op tal fan plakken yn Fryslân. Op inkele lokaasjes wurdt it stik spile mei Nederlânsktalige boppetiteling. Alle spyldata steane op www.tryater.nl.